所謂知恥近乎勇,潘頓騎「真慷慨」、「盈利駿馬」、「永旺年年」連吃三記悶棍屈居亞軍之後,第九場三班千六米終於坐正唔再做二奶。呢場佢騎蘇廐5.6倍馬「好主意」後上及時趕過沿欄一度走甩之「勁嘉輝」,勝出個人呢日第一win,兼捧走埋花旗盃,可算吐氣揚眉。
「好主意」大前季三捷,對上兩季未勝,當中上季最後一仗,由鄭廐轉蘇廐初出配潘頓跑第二,未竟全功,呢日休後季內初出以同一配搭補中,七歲灰馬近三季首次報捷,幫蘇保羅擦亮招牌。不過整個贏馬過程都驚險,皆因直路初段「好主意」被外側雷神之「曦世之寶」壓入撞了幾下,一度困在馬群中,幸潘頓神勇狂鞭殺上,最終以頸位之微力壓「勁嘉輝」勝出。
徐雨石搏輸「勁嘉輝」,唔可以連同第七場「飛躍之駒」起孖,前駒跨季四仗跑二二三三,來港至今仍未開齋。呢場跑第三係2.3倍大熱門雷神座騎「曦世之寶」,花旗盃近四屆最熱嗰隻統統冇Q,數據好邪,第四名則係全場唯一美國馬胡廐「皇牌」,四重彩派七千六百幾。