鄭融、連詩雅（Shiga）喺旺角麥花臣場館舉行一連兩場演唱會，噚晚去到尾場，有關心妍、薛凱琪、鄭融外藉男友等去捧場，雖然老外唔識中文，不過都坐足全場，兼睇得好投入，唱快歌時仲同朋友企起身跳舞，又用手機拍片。

繼第一晚鄭融講自己嘅心路歷程之後，噚晚再到Shiga有感而發，佢話：「入行以嚟，好多人支持我，但亦有好多差嘅評語，負面新聞，唔明點解大家唔包容我，其實我唔係完美，呢啲會令我成長，我亦覺得好幸運，喺呢啲聲音入面令我壯大。」講到呢度，Shiga忍唔住喊咗出嚟，問台上嘅樂隊：「有冇人可以畀張紙巾我呀?」雖然負責彈結他嘅緋聞男友徐浩喺台上，但係就無動於衷，最後係其他樂手遞出紙巾。

鄭融、Shiga喺完騷後接受訪問，講到早前被直髮器燙傷腹部嘅鄭融，突然唔見咗個疤痕，佢話係用咗透明膠布遮住：「之前燒焦範圍實在太大，幾日前甩咗焦皮，傷口位嘅皮膚好脆弱，唔可以用化妝品去遮。」

鄭融、Shiga異口同聲表示雖然兩晚騷順利完成，但覺得太快：「之前為咗個騷好多憂慮，o依家變得唔捨得。」鄭融話：「好多情緒爆發出嚟，通常我有情緒嘅時候會收埋自己喊，但呢個騷有好多touching位，同其他歌手一齊做好難得，Shiga好包容我，因為我係一個好蝦碌嘅人。」Shiga接住話：「我台上經歷唔多，阿融畀好多意見教我，多謝佢。」

講到Shiga喺台上感動到喊，佢話：「因為我唔係好多舞台經歷，能夠踏上舞台好感動，好感恩，有時會諗係咪好多人唔鍾意我，能夠踏上台好激動。」至於緋聞男友徐浩冇遞紙巾，佢就幫忙解釋：「可能佢忙緊。」鄭融就話希望可以爭取到再同Shiga一齊再搞演唱會。