迪布尼爆Seed 轟馬天尼斯亂點鴛鴦冇前途
曼城比利時馬天尼斯奇雲迪布尼
比利時自從有奇雲迪布尼呢一代球星崛起之後,前中後同龍門四線都有人滿之患,但偏偏2014世盃同2016歐國盃都冇料到。黎到下年世盃,改由馬天尼斯教之後,雖然喺外圍賽繼續好有霸氣,但前幾日友賽實力份子墨西哥,馬天尼斯改打5-3-2就見真章,只能夠靠盧卡古入兩粒逼和3:3。
26歲嘅迪布尼唔知係咪好想把握當打時期嘅世盃機會,就直斥馬帥嘅戰術唔掂:「踢4-3-3嘅墨西哥明顯戰術性較強,佢哋逼到我哋條5人防線被逼縮得好後,然後我哋中前場嘅5個球員,就要對住人哋7個人,最後都係靠天才波追和,擺明就係戰術上唔夠好,太多攻擊球員想用波,所以一面對呢個級別嘅球隊就會出事,到而家都冇解決方法係幾令人尷尬,總之下次再面對呢種球隊,就一定要變。」
批評完一輪,迪布尼都戴番個頭盔:「一切都係教練決定,我相信佢嘅團隊會搵到解決辦法,下次唔會再咁樣。」比利時禮拜二將會主場友賽日本,繼續備戰世盃。
上場波比利時改打5-3-2,用翼鋒查迪尼客串左翼衛,而中場迪布尼、泰利文斯、夏薩特同埋韋素都係需要用波嘅球員,結果一班球星就畀墨西哥嘅整體戰打到暈陀陀。睇嚟喺曼城跟哥迪奧拿踢到風生水起嘅迪布尼,就唔多頂得順國家隊嘅唔順利喇。
----------
曼城主力球員已經進駐『BFB CHAMPIONS 2.0』!快啲建立你嘅藍月亮軍團啦!
http://bit.ly/2xrTKGM