國慶係中國人日子，本地騎師今午（1日）頭場失威後，第二場三班草地1800米，隨即由梁家俊與師弟潘明輝包辦連贏。梁家俊策騎苗禮德馬房「豐彩皇」勝出，單Win及組合獨贏A2分別派37及19元。潘明輝以同屬熱門的「可愛寶」跑第二，兩師兄弟串成11倍半冷Q。

「豐彩皇」跑至五歲今仗第13次在港出賽，初配梁家俊，靠均速前置守第四位戰略下，末段衝刺凌厲，輕勝1.25馬位，打開馬兒在港勝門，鞍上人可謂交足功課。呢位靚仔騎師季內第二次同苗禮德並肩作戰，兩人從中取得上季至今首場合作頭馬。

這天除了是中國國慶日，亦是29歲騎師梁家俊太太阿Kit李潔瑩的34歲生日正日，家俊仔贏馬，正好是送給懷孕6個月的太太最佳生日禮物。今場家俊可分到約7萬多元獎金，唔知佢哋會點慶祝呢？

仲有一點比較特別的是，梁家俊季內暫得「平湖之星」、「豐彩皇」兩Win，都在田草交出，谷草未開糊，至於苗禮德之前兩捷均於谷草，「豐彩皇」幫佢敲響新季田草勝鼓。

第二場二至四名分別為「可愛寶」、「安荃」及「鈦金剛」，四重彩派8,116元。