朗尼醉駕載女呢單醜聞，激到高蓮嗌離婚，到底呢位疑似小三係乜水。之前都報道過關於呢位叫Laura Simpson嘅廿九歲女士，話佢係房地產經紀，但就唔知乜頭乜路。不過，經過英媒再起底，原來佢一年都賺成4萬鎊（約40萬港元），除番開即係一個月都有成三萬幾使，但佢嫌唔夠，所以上網站登記搵所謂嘅「Sugar Daddy（糖心爹哋）」，求一個月有6000鎊作為經濟援助。

當然，如果大家聽過Sugar Daddy呢個term，就應該知道自稱為Sugar Baby嘅佢哋，同娼妓係有分別，唔係賣肉體或一夜情，而係建基喺感情上，如果對方唔啱自己，係可以拒絕嘅，呢種糖心關係喺歐美好流行，但說穿了其實就係援助交際。英媒就喺網上搵到化名「Loloura」嘅Laura Simpson，形容自己個樣好似公仔，話自己想搵多啲樂趣。

Laura個profile仲話自己想過豪華生活，又話如果有人資助佢可以去西班牙馬貝拉島或希臘愛琴海嘅米可諾斯島渡假就好喇，但就希望對方唔好管束佢生活，最好約會可以彈性啲。後尾傳媒仲發現，其實佢喺Twitter亦都曾經向部分影星要求過包養，包括approach過美國劇集《花邊教主》男星Ed Westwick要求約會，但就搵唔到有咩證據兩個人有出街過。