當年今日
關於我們

地產多聲道:新地上下齊搞環保

蘋果日報 2002/01/09 00:00


蘭西噚日講到新地(016)旗下物業管理公司搞咗個分類回收廢物計劃,新地方面補充話,呢個計劃獲得嘅收入,會撥入各屋苑嘅管理帳戶內,專門用嚟推廣環保。
其實管理公司搞多啲環保活動,提高住戶嘅環保意識,最終得益嘅都係大廈住戶。
新地旗下屋苑喺多年前已經採用環保設施,為咗進一步推廣環保意識,新地旗下啟勝同康業兩家物業管理公司重同食環署合作,推出一系列環保活動,下個禮拜六喺沙田新城市廣場舉行開幕禮,到時新地主席郭炳湘嘅夫人會以環保大使身分出席,環境食物局局長任關佩英自然都會出席。據聞今次新地會有多個部門一齊參與,新地咁重視呢個活動,希望對推動環保潮流有幫助。
蘭西