今日喺港島行嘅市民，或者會見到黃耀明同何秀蘭坐住駕車，甜蜜蜜遊車河。大家無眼花，真係佢哋嚟㗎，皆因港大民調顯示，何EE選情未見穩定，暫時只係排第七，即係會出局，所以明哥現身撐場，希望何EE冧莊成功。何EE形容選情激烈甚至近乎慘烈，指自己只係爭少少票，呼籲選民多多支持，以便喺建制手上搶返尾席。

明哥仲講返何EE一段情，透露2011年認識但未熟，2012年因為搞國際不再恐同日而相熟，憶述第一次同何EE交手，覺得呢個人真係企喺同志同性小眾嗰邊。至2013年頭，盛傳特首梁振英會喺施政報告就性傾向歧視立法做諮詢，最終卻轉軚，當時何EE提議搞大愛同盟，結果催生咗呢個組織，亦令兩人成為同運上親密戰友。

明哥話呀，作為同志弱勢社群，係好辛苦，「而呢個人（何秀蘭）癲癲哋，佢直不甩，一路咁企喺同志身邊」，覺得議會需要新動力，但都需要資深人士熟悉議會運作，所以支持何EE冧莊。

同區其餘參選名單詳見此網站：
http://hk.apple.nextmedia.com/legco2016/region#info-all