梁振英今早再次發揮「語言偽術」，惹來唔少市民及網民怒轟，而王維基今午喺記者會上，亦直斥梁振英嘅言論係火上加油﹗

唔少港視藝人，亦有留意梁振英言論及王維基開記者會，黃日華喺微博問： 「睇完新聞直播，大家有何意見？」

李雨陽亦鬧爆梁振英： 「梁特首，你都幾矛盾架喎～我地（哋）本來就有一個好好既（嘅）平台，可以盡展所長，但你就推倒個平台，然後就希望我地（哋）可以發揮才華～哈哈，咁洗唔洗推倒香港，再好好希望市民安居樂業呀？」

而姜文杰就用另一種方法表達訴求──唱歌。姜文杰喺微博貼咗條片，叫做《逼死我》，佢話： 「我的情緒。我的想法。只能用音樂發洩。如有共鳴，請幫我傳出去，讓大家明白香港電視現象對樂壇造成的各種影響。給香港歌手一個生存的空間。感激萬分。香港歌手姜文杰。」

而前日喺政府總部激動喊爆嘅「金像師奶仔」劉玉翠，今日就繼續返公司，為港視劇集做後期工作，兼同同事一齊合照。

至於蒙嘉慧（YoYo）就同好友周子駒行山散心兼挑戰自己，佢話： 「為了飲杯咖啡，你可以去到幾盡。」 YoYo仲自爆因為貪方便，所以着鞋唔着襪，搞到腳底好痛，令佢好後悔。