可能係巧合，亦可能係風格問題，圈中有唔少女星愛嫁導演，而事有湊巧，佢哋都嫁得好低調。

舒淇、馮德倫
舒淇同馮德倫傳緋聞多年，至舊年6月公開戀情，估唔到到9月就公布婚照宣佈結婚！當時舒淇正身在捷克拍攝馮德倫執導嘅新片《俠盜聯盟》，佢哋即喺拍婚照前幾日，先集齊「所需物品」，非常即興；而且佢哋仲低調到連劇組工作人員都唔知佢哋結咗婚，但有一日突然放假，故估計佢哋就喺嗰日舉行婚禮。

關詠荷、張家輝
演而優則導、曾經執導電影《陀地驅魔人》嘅張家輝，喺2003年迎娶女友關詠荷，兩人當年於悉尼結婚，由一名婚姻註冊官家中見證，當時家輝表示婚禮簡單而隨意，一對新人均沒有穿上傳統婚紗同禮服，但關詠荷喺簽婚書一刻，仍激動落淚。二人育有一女Brittany，現年11歲。

湯唯、金泰勇
憑《色‧戒》走紅嘅女演員湯唯，喺接拍韓片《晚秋》時，同同片導演金泰勇撻着，兩人於2014年7月初先發表訂婚聲明，同月中假瑞典一農莊秘密舉行一場夢幻婚禮。翌月先透過經理人公司公佈喜訊。而湯唯舊年8月為老公誕下一名B女，佢當時仲話囡囡係全醫院喊得最大聲嗰個。

林嘉欣、袁劍偉
喺2010年，林嘉欣同袁劍偉低調喺加拿大溫哥華舉行婚禮，兩人嘅婚訊更喺3個月後（2010年9月）先曝光。佢哋嘅婚禮獲雙方家人出席支持，圈中人就只有嘉欣契媽潘迪華一個，非常低調。同年嘉欣喺溫哥華誕下女兒Kayla，到2013年再生次女Sofie。