星期五港股大跌逾500點，夾雜幾個因素。特朗普行程已預示G7峰會有機會鬧翻，投資者自然要驚定先，結果喺周日執筆時未能就G7聲明達成共識，但睇返美股周五晚並無不妥，中港股理論上亦非風眼所在。

阿根廷危機非舊聞，至於騰訊（700）傳被美國國會調查，向來投資者冇期望過騰訊喺美國大展拳腳吧。

內地A股上周五拋售，似乎更致命，次次A股主要指數出現大陰燭，港股實跟跌幾百點。A股不嬲係難測因素，暫時睇上證指數3,000點樓上一向有支持，拉長啲睇，中線走勢似有逐步回穩迹象，睇吓上證指數能否承接近月情況，單日走完鬼就冇事。港股能否一浪高於一浪，重點唔係外圍形勢，而係睇A股、睇中國。

目前市場憂慮貿易紛爭最終會拖累經濟復蘇進度，咪睇中國GDP升嚟升去每年6至7%好似冇乜指標可言，但GDP只反映top line，其實企業bottom line一直好轉。上游重工業、設備行業訂單顯著增長，下游消費零售業走出低谷、重拾升軌，迹象顯示復蘇比想像中更可持續。

雖然港股主要指數未跟隨美股擺脫上落市而轉為向上，皆因正負因素夾雜，但正面因素如消費模式改變及中國製造產品升級潮，似乎正喺個別增長型及周期性股份之中形成機會。因此，要去估一個後市方向嘅話，小弟仍期望中線能夠向上。

晋佳
http://www.facebook.com/advanceguy1