港股繼續「等運到」，恒指雖然炒高54點，但成交縮咗一大截。個市悶番啲，但係啲暗湧就愈嚟愈勁，七大工業國開會，例牌「迫」人民幣升值，不過人民幣係中國有自己嘅國情，你有你講，我有我做，人民幣逐步慢慢升值，唔單止係按國情辦事，甚至係國策，真係相信人民幣會突然大幅升值，係不切實際，但係美國中期選舉嚟緊，炒「人仔」升值，絕對唔係盲目，係恰當嘅諗法，係合乎政治環境嘅策略。
「人仔」係唔係升值對香港暫時冇乜大意義，不過，「人仔」炒升值同資金流向就好有關係，起碼啲炒家係咁諗，所以有必要留意個市會唔會用嚟炒作。

華能C輪9541：國內專家話宏調初見成效，油價又落番咁多，睇嚟60蚊美金個關口都會失守，你話啲電力股係咪要拍手掌。華能（902）近兩日先郁，比起啲飛機股、汽車股反應慢咗好多，昨日報收5.30元，升1.3%，10日線升破20日線，成交多番啲，吸引嘅地方係橫行咗好耐，啱啱先起步，保守估計都會推去5.80元嗰頭。
華能C輪9541𠵱家造18.7仙，槓桿率28.3倍（有效12.3倍），仲有4個月命，引伸波幅20.5%，正股升上5.80元，9541應該喺45仙樓上，就算唔好咁大貪，等正股升上5.50元，都會見28仙，現價買入，正股跌穿5.15元止蝕。
俊樺