領匯轄下一啲商場嘅酒樓在下午茶時段罷市，得啖笑。下午茶時段係平價優惠時段，罷市一日，唔傷老闆脾胃，但可增加聲勢，罷市喎，香港幾罕有㗎。報紙話一間牛頭角樂華邨商場嘅嘉華大酒樓已經營逾二十年，面積近四萬平方呎，去年續租兩年，加租一成四。你估租金係幾多？每月呎租五元五角！抵唔抵呀？應該係市場租值啩？
呢邊酒樓於下午茶罷市，嗰邊慈雲山中心街市商會聯會及慈正邨正德樓互助委員會就發表聲明，支持領匯做法，認為領匯已帶旺人流、帶旺街市生意，商場內新酒樓生意幾好。
睇到呢段新聞，住在火炭嘅工程C就希望領匯快啲翻新禾輋商場，益吓火炭街坊。工程C別無嗜好，甚為慳家，乜錢都唔使，成個住家男人，只係鍾意到街市買餸，親自下廚煎牛扒與蒸條靚魚啫。佢因工作關係，經常放工後到九龍城街市及街市外圍買餸，發覺九龍城啲貨色夠晒正斗，當然價錢並不便宜。有一次，魚販打電話畀佢：「C先生，有條好大方利，啱晒你食，使唔使留番畀你？」工程C立即飛車去到，嘩，條方利成三呎長，見都未見過，正是欲食海上鮮，不惜腰間錢，立即買咗，返到屋企廚房，雖有大鑊，仍要將條魚斬成兩截先至可以落鑊蒸。蒸好之後，果然美味，無以尚之。