【當狗狗係屋企人】愛協呼籲勿亂用狗帶 鄭俊弘認用釘帶訓練Riley
狗狗鄭俊弘何雁詩寄養釘帶
鄭俊弘同何雁詩又有是非纏身,今日有周刊報道,因為何雁詩唔係好接受到Fred同舊愛嘅寵物Riley,再加上Riley對住何雁詩嘅行為反叛,唔係好肯跟之餘,仲會對住何雁詩吠,搞到何雁詩都好抗拒Riley,結果Fred為咗女友,搵咗條有倒鈎嘅釘帶俾Riley,之後仲去將佢送咗去親戚屋企暫住。
其實喺今朝一早,何雁詩已經喺fb講過呢件事,佢話:「謠言止於智者,Riley好地地喺屋企瞓緊,絕無棄養。每個人也有過去,私生活不應亦不會影響狗狗與主人的關係。其實我是狗癡⋯唔係好明發生咩事⋯」但係似乎平息唔到愛狗嘅人嘅怒火,唔少人留言狂鬧!
去到中午時份,阿Fred同何雁詩分別喺ig留言再為事件解畫,Fred貼咗Riley嘅近照兼用英文留言,內容大意話:「我同Riley生活已經有有4年幾,初初抱佢返嚟嘅時候,佢只係一隻有毛病嘅流浪狗,經過幾個月嘅照顧,Riley回復健康同快樂,但係有一次我叫佢個名,佢冇理到我,仲差啲俾車撞到!」
Fred話嗰陣同Riley去咗訓練學校上堂,因為Riley有時太過活躍,於是佢喺導師嘅建議下,用咗一條釘帶(Prong Collar),佢話:「呢個係非常常見嘅訓練工具,係為咗了確保狗隻本身,甚至其他狗嘅安全。無論如何,我永遠唔會傷害Riley,亦冇諗過會棄養佢,事實上我一早已經當咗Riley係個仔兼屋企人。」Fred亦都為女友澄清,佢話:「Step同Riley相處得很好,佢本身好鍾意同關心Riley。」
之後何雁詩亦都喺貼咗張Fred抱住兩隻狗嘅相,又係用英文留言話從來冇諗過棄養Riley,用釘帶亦為咗Riley同其他嘅安全,佢仲話:「為咗呢件事覺得好困擾,我從來都唔會棄養,本身亦同Riley相處好好,希望大家明白佢哋嘅立場,知道發生咗乜嘢事。」
至於愛護動物協會(愛協)則指,會嘗試聯絡狗主了解事件,亦唔建議狗主用choke chain式嘅狗帶,亦呼籲市民唔好以懲罰式嘅方法訓練狗隻。愛協指巿面上有好多其他款式嘅狗帶可供選用,若狗主覺得喺訓練狗隻上有問題,可向愛協查詢及上堂學習點用狗帶。
更多娛聞,喺晒《娛果》
http://fb.com/appledailyent
何雁詩今朝一早已經喺fb開post留言。(fb截圖)
Fred喺中午亦留言話自己好錫Riley,從來冇諗過棄養。(ig截圖)
Fred話因為Riley太活躍,於是導師建議用釘帶。(ig截圖)