今日恒指創新高並首次企穩萬九點樓上，港股由今年6月中止跌回穩，已一口氣連升5個月，今月初更首次衝破歷史性萬九關口，網友不禁問究竟乜嘢原因令恒指升極都有？
係《香港討論區》內，網友就港股升因進行投票，結果約63%指大戶托市；熱錢流入及市場炒賣國企股同樣佔11%；5%認為人民幣升值，其餘係大戶引散戶入市（3%）同炒窩輪（3%）等因素。其實，上面所講嘅原因都係瓜藤關係，好難獨立分開；由於市場預期人民幣升值，熱錢湧入港股，炒賣紅籌國企，因而推高恒指及H股指數；所以，網友willwin話阿嬸、師奶一日未入晒市，大戶都仍然繼續撐着。

國壽股價高危

此外，中資金融股為近排港股升市火車頭，因此亦有網友投票選五行三保（5間內地銀行及3間保險股）中最高危股份？
國壽（2628）成為眾望所歸，高佔51%，Garysuen認為國壽今年升得過急，1年內升咗1.6倍，現價17.9元，所以非常危險。其次係中國財險（2328）佔15%；建行（939）佔11%；招行（3968）為8%；交行（3328）7%；中行（3988）5%及工行（1398）3%。不過，最奇怪係平保（2318）股價係今年已升咗成倍，竟然冇網友認為屬高危族。
其實，國壽未必係咁高危，因為佢會喺今年發A股，唔似其他股票係高位抽水咁危險；再者，係發A股前，國壽股價應會被頂住托起，理應冇咁易跌得散嘅！