由北角出發嘅10K賽事，參加嘅包括心悠BB，至於之前話同佢一齊參賽嘅張智霖就——甩底了。仲有HotCha嘅張紋嘉（Crystal）及張惠雅（Regen）、鄭融、周柏豪同弟弟柏文，以及鍾舒漫等等。眾人因為一齊出車到起點，未有經過記協派發藍絲帶嘅位置，故未有佩戴。

今早心悠BB四點幾已於北角熱身，拉拉下筋仲除外套，凍到成個人震晒。BB都話今年係佢參加渣馬以來最凍一年，希望warmup咗之後個人好啲:「估計今年成績都係一個鐘頭多啲啦!」

講到張智霖甩底喎，BB就話未有為此影響戰意，仲話:「佢係因為工作所以嚟唔到，我同佢都係同一個教練，教練都話佢體能好好。」

談到今日記協派發藍絲帶力撐新聞自由，心悠BB表示:「自己好支持新聞自由，但我今日身份係代表fancl，未知有否牴觸，所以不便佩戴，但我係好支持新聞自由。」

最後心悠BB以1小時07分48秒完成10K，於藝人跑10K組別中，排第五，慢過鄭融兩分鐘。見心悠返嚟時有啲吃力，佢話:「路好上凍，手指都僵晒。」

但佢話今年覺跑得幾好，特別係尾段攞命斜:「今年竟然可以一直跑返嚟，冇停過!」至於去年成績係1小時6分鐘，慢了分零鐘。