當年今日
關於我們

隔牆有耳:立會魔鬼隊 共黨玩晒 - 李八方

蘋果日報 2012/05/18 00:00


就好似少林隊對魔鬼隊咁,呢一場反替補拉布戰,無論球證、旁證、足總、足委,都係共產黨嘅人,套用電影《少林足球》四哥嘅一句對白:「同我鬥!」
香港人要記住呀,就係呢隊立法會魔鬼隊,由黑哨主席曾鈺成,到中指隊長黃宜弘、仲有絕食搏同情嘅劉健儀等魔鬼議員,一人一腳成功爭取將立法會變成香港人民大會堂!
呢一場慘烈嘅屈機比賽,由一首生日歌展開序幕,撞啱係黑哨曾65歲牛一,噚日凌晨,大批議員趁休息同佢老人家唱生日歌賀壽,長毛見到個蛋糕仲興奮到大叫「你都有今日喇!係咪任掟先?」當唱到「年年都有今日、歲歲都有今朝」,黑哨曾仲尷尬苦笑,原來佢已準備大開殺戒。
場波打到清晨四點幾,平時最叻開會瞓覺、同向市民舉中指嘅功能組別議員黃宜弘,竟然開聲講嘢,話做過「研究」,要終止呢場辯論。黑哨曾即場做嘢,屈機吹停上半場。
拉布嘅少林隊畀人廢晒武功,黑哨曾草草吹雞打埋下半場。金勞詹、亡國興、謝偉俊等魔鬼議員,喺呢個時候就出賤招狂砌。自動當選嘅金勞詹話,泛民少人「就要爭取選舉,令你多啲人」;鼠王芬仲話自己係「少數」,修改唔到議事規則,但市民好憤怒喎。
一路屈機一路劈人都未算賤,佢哋仲有隊員做埋「傷兵」呀。無啦啦要絕食嘅自由黨劉健儀,話自己血壓升至213,有中風危險,要入廠檢查。咁啱噚日係世界高血壓日,劉議員,你唔掂就咪落場啦!

mailto:[email protected]