金嗓子（6896）「霸氣大媽」江佩珍（珍姐）霸氣去到俄羅斯！一講起金嗓子，一般人會諗起喉糖，財經界仲會諗起董事長江佩珍舊年喺公司上市時功架十足咁打鑼，成為孖屐一時佳話，家陣佢呢陣霸氣仲會去到俄羅斯㖭呀。
金嗓子噚日中午出通告話，有兩款喉片產品獲得俄羅斯國家進口許可註冊，公司嗱嗱聲搵到俄羅斯樂曼特做總推廣商，為首批產品打入當地市場做準備，預算今年底開始出貨，公司亦會喺今年底去莫斯科參加博覽會做推廣。受到呢個衝出國際嘅消息刺激，金嗓子股價噚日逆市大升13%。

由女工捱到黨委書記

年約70歲嘅珍姐相當健壯，平日講嘢中氣十足，聲音響亮。佢好捱得，10歲細路女就由工廠女工捱起，喺柳州市糖果二廠（廣西金嗓子前身）做女工，一路升做廠長兼黨委書記，1998年正式成立廣西金嗓子，舊年來港上市。
佢當時都有話，希望可以將中藥配方嘅金嗓子喉糖推廣到海外市場，估唔到咁快做到，仲要一推就推去俄羅斯，唔知佢會唔會畀俄羅斯總統普京試下有佢嘜頭嘅喉糖呢？話時話，珍姐幾十歲人仍然十分好學，公司來港上市一年，佢就努力學廣東話，早前主持業績會都講咗幾句，家陣佢應該要學埋俄語喇喎。

李華華
mailto:[email protected]