【本報訊】網民上周六舉行反網絡23條街頭記招，經常在立會拉布的社民連議員梁國雄（長毛），突被部份參加者指控沒為此議案拉布，他即場澄清已答應議員黃毓民拉布但仍遭包圍，之後有人在網上繼續指摘長毛不拉布。新民主同盟立法會議員范國威昨稱，「如果係刻意地策動包圍長毛嘅行動，我認為係好可恥」。
長毛事後在facebook撰千字文章回應事件，強調提交修正案是拉布方法之一，但更重要是於二讀討論中冗長發言，「我答應咗毓民嘅嘢係永遠都有效，就係我會同佢一齊拉布」，然而終有一日被剪布，要拉倒法例必須靠議會外群眾運動，使贊成票不過半數，或迫使政府收回條例。

民主黨不參與拉布

范國威昨質疑有人故意挑起矛盾，「事後我睇短片，明明長毛已回應佢會拉布，但市民聽唔入耳，不斷圍住佢，我覺得好可惜」。他質疑有人把視線轉移引內部矛盾。他強調支持公民黨郭榮鏗、工黨何秀蘭和人力陳志全的修正案，若任何一個被否決，他都會反對原議案，亦會積極拉布。
民主黨主席劉慧卿則指，該黨不贊成包圍別人及使用粗言穢語，亦不希望立會大樓周三外面有衝擊致受傷。她指民主黨不會參與拉布，但強調該黨「有嘢講就會講，我哋民主黨頂天立地，清楚知做咩及點做，文明社會要尊重，唔係你唔做就圍你搞你」。
■記者白 琳、姚國雄