政府總部同特首辦上周突然針對記者落閘、引起唔少傳媒行家怒火中燒後，行政署立即認衰，指事件純屬「溝通誤會」。噚日八方同事又去採訪行會，發現保安態度有所改善，見到記者即主動開閘，新聞處亦派員全程跟實，上周唔准記者用的西翼兩個閘口，亦畀番記者使用。
雖然係咁，政府安排仍大有改善空間，包括特首辦大堂明明裝晒畀傳媒傳送資料嘅裝置，但就至今將記者拒諸門外，要記者喺寒冬下食足四粒鐘海風。難怪有行家話早排天氣凍時，要匿喺鐵馬帆布後避風，同露宿者冇乜分別。此外政總明明有通道畀人由西翼去東翼，偏偏又係記者唔准用，只能用需推開六道門的通道，體驗「門常關」之苦。難怪記協早排已約見行政署投訴，可惜該署懶懶閒，至今未有回覆。