講起1992年嘅巴塞隆拿奧運會，有「夢幻隊」之稱嘅美國男籃肯定係當屆奧運會嘅標記之一，原來今日咁啱就係 Dream Team 喺奧運會大炒歐洲強隊立陶宛嘅25周年！

話說當日係奧運男子籃球項目嘅準決賽，美國隊喺上半場「只係」領先19分嘅情況下，下半場「爆seed」喪攞分，最後大勝127:76、贏51分完場。「夢幻隊」當日12位球員有其中九個得分達雙位數，最多嘅係射入21分嘅米高佐敦（Michael Jordan），之後就係18分嘅卡爾馬龍（Karl Malone）同埋有14分嘅「魔術手」莊遜（Magic Johnson）。美國隊最後喺決賽擊敗克羅地亞，以摧枯拉朽嘅姿態贏得當年男子籃球項目嘅金牌。