【與李婉華對談】王喜被網民譽為港版蝙蝠俠：我唔係病毒載體呀！
蘋果日報 2020/03/01 14:45
王喜李婉華警暴武漢肺炎
王喜今日為李婉華的YouTube頻道《住加女人》的直播節目擔任嘉賓，以視像形式大談對現時香港、警暴甚至武漢肺炎的感受，吸引逾2,000人收看，更有網民大讚王喜是「香港蝙蝠俠」，他笑謂：「我唔係病毒嘅載體呀！」
王喜近日為港台節目《頭條新聞》拍攝《驚慌訊息》單元，以嬉笑怒罵的形式，嘲諷克警，他在節目中提到《驚》：「我哋用呢個嬉笑怒罵嘅形式去反映荒謬，點解要用呢種方式？正正係因為言論自由嘅收窄。趁未俾人拉，咪做嚟笑吓，如果有日我消失咗、冇得睇，大家都可以喺facebook、YouTube搵返嚟睇。」
李婉華問他是否因為曾經當差，因此特別感受到現時的不公？王喜斬釘截鐵說：「唔係因為我做過香港皇家警察，因為今日我依然係香港人。我哋唔係阻住差人做嘢，係唔希望差人犯法。」他以家傭比喻警察的職務，認為大家對警察的期望，因為香港人出糧予警察。王喜說：「我哋期望家傭，唔會偷嘢、唔會偷懶，要循規蹈矩，我哋有期望係因為我畀錢你做嘢。你唔需要做我冇叫你做嘅嘢，我冇叫你打人、我冇叫你犯法。」他認為警察應設中立立場，不是因為警員特別高尚或理性：「如果take side，take咗20%嘅人，但係有80%嘅人對立，邊個係大眾邊個係小眾？而家take咗20%嘅人嗰邊，咁咪愚蠢囉，我只係想佢哋減低表演愚蠢嘅部份畀大家睇。」
有網民問王喜是否相信有「白警」？他再次斬釘截鐵說：「唔信，佢哋冇一個係無辜。身為白警，最簡單嘅定義係，唔做克警做嘅嘢，咁乾脆唔好做警察。唔通眼白白睇住人犯法，自己袖手旁觀？咁係咪比克警更衰？咁佢又點會係白警呢？唔想做嘅人，應該離開呢個地方。」
王喜自言在佔中時代是藍絲，分享自己藍轉黃的過程：「首先，我係炎黃子孫，所以一定係黃，佔中嗰陣係誤入歧途。最大嘅轉折係警暴，睇到犯法、酷刑，甚至有位好勇敢嘅女士出嚟講被輪姦、超過六千具死因冇可疑嘅屍體，有受過九年免費教育嘅人都會明白。」他指其中約一個月前，油塘高翔苑有男人墮樓，令王喜堅定相信自己的信念：「係呢件事之後，我先講得出『XX死全家』，有個警察家屬都因為呢件事，打嚟同我哭訴同大嗌呢句口號。」
因武漢肺炎疫情持續，王喜透露在農曆新年後設立「派更車」，為高齡、獨居、居住偏遠地區及有危疾的人提供義載：「我哋會幫人送『餸』同埋車人去覆診，減低佢哋曝露喺公眾地方嘅時間。」王喜自嘲雖然連同自己，暫時只有3位司機，但仍希望能為香港出少少力。
談到武漢肺炎，王喜直言是「生化武器擴散」：「呢個唔係自然嘅瘟疫，我信係人為嘅生化武器，製造呢個武器嘅人，目的係想殺人，而家係worldwide globally咁攻擊大家。」李婉華透露溫哥華的大型超市，亦有華人開始搶物資，貨架空空如也。王喜表示只為媽媽屯積兩包米：「其他冇搶啦，只要有麵包，我都唔介意。」
對於不少網民感謝王喜發聲，他語重心長說：「我有試過失眠，有段時間要食安眠藥先稍稍瞓到，合埋眼睇到啲畫面，覺得自己好冇用。呢幾個月，其實我冇攞啲乜出嚟，係攞咗啲口水、攞咗部cam，我冇流過血、冇斷過手、冇爆過頭。好多人為香港嘅福祉，攞埋條命出嚟，我嘅付出係微不足道。」最後，王喜勉勵大家：「香港人就算散落喺唔同地方，只要有香港精神，那怕只係劏房咁細嘅地方，嗰度都係香港。」
撰文：盧妹
《果GYM》隨身播 健身壹App過！
