暑假就到，又係家長苦惱點樣幫小朋友放電嘅時候。挪亞方舟最近成立「挪亞學堂」，希望透過舉辦寓教於樂、以STEM為主題嘅暑假體驗營，為6至12歲嘅參加者提供生活技能訓練，包括大自然尋寶探秘營，朱古力戲劇夢工場日營同機械智能全接觸夏令營等。7月21日至8月26日逢周五、六及日更會舉辦一連六周嘅「玩轉機械智激FUN」，畀小朋友參與智能破案小偵探等機械智能遊戲，體驗領先科學。
新地執行董事郭基煇（Adam，圖）噚日出席學堂啟動禮撐場支持，憶述細個讀書都覺得好死板、好辛苦，成日要死記，好羨慕𠵱家嘅小朋友有機會參加咁多元化活動，希望相關體驗營可以幫到小朋友培養興趣同訓練生活技能。

「爸爸學識忘記過去」

問到爸爸郭炳江嘅情況，Adam話爸爸服刑後曾探望過一次，大家一直書信來往。雖然爸爸頭一個星期好掛住屋企、唔係好習慣，但心情經調整後已經平靜，學識忘記過去，保持番過去一貫嘅勇氣同信仰。佢透露爸爸已經完成基督教研究碩士課程，𠵱家開始修讀哲學碩士課程。