35歲嘅大陸男星高雲翔日前為新戲《阿那亞戀情》赴澳洲雪梨拍攝，據澳洲媒體報道指，高雲翔於當地拍戲期間，於酒店內涉嫌性侵一名36歲女子，消息指與高雲翔一同被捕嘅，仲有一名同為35歲王晶(音譯Wang Jing)嘅男子。導演王晶今早回覆《蘋果》時話﹕「多謝！我在香港，我起碼識五個王晶。」

無綫最近購入由愛奇藝出品、王晶監製嘅網劇《冒險王衛斯理》，王晶今日率演員余文樂、任達華、林家棟，仲有愛將胡然等現身將軍澳電視城宣傳，並安排於4月29日起，逄周日晚上八時半連播兩集。

對於「王晶」名字被牽連到涉性侵事件，王晶話今早已睇報道：「有睇，我諗大陸有五百個王晶，我都識五、六個，同本身真名唔係叫王晶(原名王日祥)，有咩事唔係咁叫。」問到是否認識涉案嘅王晶？王晶笑笑口話﹕「唔識，35歲，點會係我吖，我都想呀，35歲。(無辜受牽連？)冇所謂，其實傳媒係咁，如有人話李嘉誠跳樓，一定話最大0架，李嘉誠跳樓。」

今次賣片俾無綫，王晶話TVB係佢娘家，將來會有更多合作機會，問會否捧TVB藝人拍電影？佢話﹕「有計劃，表現好、值得獎勵同公司又力捧嘅就有份，之前都講過，朱晨麗同蔡思貝都幾好。」對於余文樂將做人父，王晶話﹕「必經階段，心同口恭喜都做晒。」

精選娛聞，喺晒《娛果》 http://fb.com/appledailyent