韓國人氣選秀節目《PRODUCE101》去年搞全女班練習生，搞到有聲有色，今年再推出男版《PRODUCE101》，經過多個月來嘅比賽後，噚晚終於選出最後11名得獎者，呢11名練習生將會以「Wanna One」組合名出道，為期一年。

當中經過一番苦鬥後，噚晚只得11名練習生成功出道，最終由大熱人馬姜丹尼爾以逾157萬票成為冠軍，第二名係同樣人氣勁高嘅朴志訓，佢有逾113萬票，而第三名至第11名就分別係李大輝、金在煥、雍成宇、朴佑鎮、賴冠霖、尹智聖、黃旼泫、裴珍映及何成雲。

當中值得一提係來自台灣嘅15歲賴冠霖，佢與「馬舞女」泫雅同一間公司，今次佢獲第七名，亦係繼TWICE嘅周子瑜，同埋DAYDAY嘅彭羽彤之後，第三位喺韓國出道嘅台灣人。

另外，《PRODUCE101》今日就公開咗11名最終能成功出道嘅練習生海報，點知卻被發現有甩漏，有啲冇入圍都喺海報內，即時引發造馬爭議，令到有關方面即急急澄清將海報喺之前製作定，因為上傳嘅照片出現失誤先會發生咁嘅情況，佢哋已第一時間作出修改。