神劇《太陽的後裔》男星宋仲基今日喺深圳舉行粉絲見面會，佢近日被內地網民封做「雨神」，事關佢所到之處都會為當地帶來大雨，而今日深圳亦同樣落住大雨，不過都冇損粉絲熱情，粉絲都係一早到達會場等候。

而宋仲基同之前幾站一樣，喺開騷前就先直播冧粉絲先，宋仲基今日就換上件黑色恤衫，佢話今天個場地噚日廣州嘅場更加大，令佢有點擔心，佢話啱啱食過晚餐，仲話食咗粉絲送畀佢嘅食物，就係深圳好出名嘅砂鍋蝦粥，而有粉絲就留言話叫佢唔好減肥，但佢話因為之後要拍電影，所以先管理身材，佢仲叫粉絲唔好太擔心，又頻頻講普通話冧粉絲，叫粉絲「今天也開開心心地玩吧。」佢仲自爆每去一個城市自己嘅中文都進步不少。

大約到晚上7點50分，宋仲基終於出場，佢一出場就被咁大場館所嚇倒了，話自己好感動。早上發現身體狀況不太好，但佢強調：「沒關係，沒關。」佢話條頸有點唔舒服，但見到大家已沒事。

宋仲基喺現場仲好鬼馬，竟然叫一對情侶咀嘴，全場一齊起哄，跟住兩人就喺宋仲基要求下咀嘴，宋仲基就畀個叻佢哋：「給力」。

之後開始測謊機遊戲，宋仲基話平日有喺家中整泡菜炒飯。問到覺得自己係唔係童顏時，佢即二話不說答係，點知就話佢講大話。提到係唔係介意女友飲酒，宋仲基話會擔心，如果搵唔到女友佢就會用GPS定位找女友，而自己嘅酒量就只能飲到一支燒酒，點知司儀就踢爆光洙爆料話宋仲基飲酒後會發酒瘋，笑死全場。

提到喺《太陽的後裔》中同宋慧喬嘅「紅酒之吻」有冇NG時，宋仲基話有NG，但猛話唔係故意，前後NG了20次，全場即時嘩然，搞到宋仲基又再次強調自己唔係故意，佢話：「就是有點緊張，嘴唇發乾。」

問到佢嘅理想型，宋仲基又再次作答，包括長髮、年紀大、清純、嬌小及食嘢時好看嘅女生，唔知係唔係講緊喬妹呢？

及後，全場大合唱畀宋仲基，搞到宋仲基好感觸，佢話13年前同哥哥來過深圳旅遊，今次再來有好深感受，因為現在受到咁多人喜愛，每次見面會都畀我好多嘅愛，亦好想同所有人每一位講多謝。