韓國天團BIGBANG嘅G-DRAGON（GD）後日就入伍，今日佢會現身濟州島出席GD Cafe「Untitled,2017」嘅開幕，連日來GD都有喺濟州監工，《蘋果》記者噚晚到GD濟州嘅Cafe直擊，雖然GD唔喺Cafe內，但現場工作人員喺入面仲趕緊工，入面仲放滿晒啲櫈，似乎為今日開幕做準備。

至於GD喺邊？原來佢就肚仔餓，仲孖工作人員去咗Cafe對面嘅烤肉店醫肚，由於有唔少粉絲聞風而至，所以烤肉店門外企滿咗約30位韓國同內地嘅女粉絲。記者從門外可見GD同朋友喺入面食緊飯，邊食邊傾到雞啄唔斷，而GD喺店內有除下外套嘅帽子，令佢個當兵新髮look曝光，可見GD為後日入伍已剪短頭髮。

而到香港時間大約10點40分左右，身穿白色有帽外套、帶住黑色口罩嘅GD同朋友原本想一齊想離開烤肉店正門離開，但因為門外有太多粉絲關係，GD等人走唔到，唯有即時返入去店內等職員安排再離開，半小時後仍未見GD現身，未知是否已從後門離開。

今早香港時間10點幾，已有近百粉絲喺GD cafe門外等候，準備一陣香港時間約下午1時多見Oppa，趁GD入伍前同佢道別。

GD將於後日喺江原道鐵原陸軍3師團白骨部隊報到入伍，預計於明年11月26號退伍。

GD過去一年除咗忙巡唱外，其餘時間都專注佢喺濟州島「濟州神話世界」內準備GD Cafe「Untitled,2017」及保齡球場，當中咖啡店今日正式開幕，保齡球場則於下月開幕。GD由建築初期到設計裝飾等都不假手於人，更居住喺濟州方便隨時監工。而今日喺「濟州神話世界」內除咗GD Cafe開幕外，隔離嘅萬豪酒店亦都於同日開幕。

更多韓流，喺晒《娛果》
http://fb.com/appledailyent