叉燒飯這回事，經過多間高級餐館以黑毛豬重新演繹，身價已經完全不一樣；舊年灣仔六國酒店炮製118蚊「黯然銷魂飯」之後，叉燒煎蛋飯又去到另一個層次；最近灣仔有間新餐廳將佢反轉再反轉，嚟個「闊佬叉燒蛋飯」，食完唔使黯然，可以充闊佬了吧。
中環「來佬餐館」上月結業，搬咗去灣仔，話事人係南華前足主羅傑承嘅女兒羅雪儀（Cherry），新餐廳開業當然要有新菜式。Cherry透露，每次推新菜式，事前都要籌備3個月，試20、30款，先至揀到幾款提供畀客。

88蚊碗用特選荷蘭蛋

新推呢道「闊佬叉燒蛋飯」（88元），睇落好似電影《食神》入面，令家燕姐大叫好好味嘅「黯然銷魂飯」。Cherry話，佢哋試咗唔同國家嘅蛋，揀咗蛋味最濃、煎得最靚嘅荷蘭蛋，叉燒就用本地梅頭，連米都試過幾款咁話。
另一款過癮新菜應該係「梳乎厘焗咖哩飯」（148元），Cherry承認係從日本偷師，佢見到日本都有推出類似梳乎厘焗飯嘅食品，受到啟發，再諗到唔少香港人鍾意食咖哩，將兩者結合推出此菜。食落口，蛋白唔會過甜，夾埋咖哩嘅味道又幾夾喎。最重要係，今時今日大家都要相機食先，呢道菜直情可以畀大家「拍片先」喇。

李華華
mailto:[email protected]