放完農曆年假，賀歲片冠軍誰屬都已經有定案，冠軍唔使問，一定係黃子華主演嘅《棟篤特工》，截至今日下午已經衝破4,000萬元票房，篤定成為賀歲片王，成績比《我的情敵女婿》1,709萬元、《捉妖記2》1,538萬元、《西遊記女兒國》879萬元都好，只係輸俾同期《黑豹》（Black Panther）嘅5,424萬元。

睇番子華神以前嘅往績，好似佢套自導自編自演嘅《一蚊雞保鏢》當年票房就只有17.5萬元、《沙甸魚殺人事件》得97.9萬元、同梅艷芳合作主演嘅《男歌女唱》都係得127萬元、編劇同演出嘅《人生得意衰盡歡》只係收5.1萬元票房，呢次真係吐氣揚眉，成功搣甩票房毒藥嘅惡名。咁開心，難怪「King Jer」噚日都開post，恭喜子華神有人接棒做毒藥……而呢位「後輩」，就係李思捷。

King Jer所指嘅係李思捷執導、主演嘅電影《一家大晒》，King Jer係根據貿發局公佈嘅每周票房作數據，引用資料《一家大晒》上映咗11日只有91萬票房，同《棟篤特工》、《我的情敵女婿》、《捉妖記2》、《西遊記女兒國》上映11日嘅票房數字比較，大幅度落後。

King Jer比較幾套電影上映日期唔同，其實《一家大晒》最早上映，由2月1日開畫至今，累積票房有125萬元，就咁睇，目前成績同《棟篤特工》差咗32倍，但再睇番演員陣容，除咗李思捷，就係得狄龍、林敏驄、蘇玉華、元秋等，又唔打大陸市場牌，有呢個成績唔算得差，首次執導算係合格，咁李思捷滿唔滿意今次成績？李思捷今日以短訊回覆傳媒話：「多謝你。香港有約130萬票房，我自己都覺得OK。一套獨立電影上7間戲院算幾好彩。多得百鳴哥旗下發行公司撐足我咁耐。o依家馬來西亞上緊86間，遲啲會喺大陸上埋。作為新兵，已經非常感恩。」

接住落嚟就到農曆年第二檔，噚日共有10套新戲上映，新年流流都係旺紅，兩套同「紅」有關嘅電影，都順利成為票房冠、亞軍，珍妮花羅倫絲（Jennifer Lawrence）主演嘅《紅雀特工》（Red Sparrow）以99萬元票房，成為開畫同單日票房冠軍，至於林超賢導演嘅《紅海行動》亦都以46萬元成為開畫票房亞軍同華語片冠軍。

另韓片《1987：逆權公民》噚日以15萬元開畫，成為開畫季軍。至於由鄭中基主演電影《大樂師．為愛配樂》，雖然票房數字只有4萬元，但佢憑此戲獲提名角逐今屆金像獎影帝，加上之前特別放映儲落一定口碑，電影相對放映場數不多，都仍有一定捧場客。而李居明監製兼主演《大迷信之3潮爆開運王》，首日開畫為6.2萬元票房。

精選娛聞，喺晒《娛果》
http://fb.com/appledailyent