【李八方online】楊哲安被野豬襲擊? 楊:好在隻豬無咩牙
野豬中西區楊哲安
楊哲安喺山頂揸車巡區,遇到野豬仔。(楊哲安Facebook截圖)
剛勝出中西區區議會補選嘅自由黨楊哲安(Jeremy)上任唔夠一個月,已經開始落區處理大小事務,Jeremy日前揸車巡區就遇到山頂常客 —— 野豬,當佢落車一探究竟時,野豬竟然愈行愈近,更加咬咗佢隻鞋一下,雖然Jeremy最後無咩損傷,但望住滿佈野豬口水嘅鞋頭都咪話唔嘔心。
Jeremy話山頂好多綠化地區,野豬、箭豬同蛇都係好常見,但最近有居民主動餵飼豬隻,令豬仔愈來愈唔怕人,更加翻垃圾桶。佢當日經過加列山道就發現一群野豬仔,當佢落車行近時,野豬仔竟然咬咗佢隻鞋一下,好在隻豬牙唔鋒利,佢都無咩損傷。至於隻鞋都唔打算洗,方便佢日後再親親野豬。
Jeremy話,雖然佢自己唔抗拒野豬,但都有居民會擔心影響衛生同埋有安全問題,所以佢希望居民唔好再餵食,以免愈來愈多;同時佢會要求區議會加設有蓋垃圾桶,令野豬唔可以翻垃圾食。講到區議會工作,Jeremy就話自己已經成功喺中環租用辦事處,但因為租約期只有兩年被抬價,租金都非常揦脷,但佢真係好想服務居民,即使要貼錢畀租都在所不計喎。
野豬仔居然張口就咬Jeremy隻鞋。(楊哲安Facebook截圖)
Jeremy希望居民唔好再餵野豬,免得越嚟越多。(楊哲安Facebook截圖)