29歲嘅名模Jessica C.（JC）前年同影星安志杰（Andy）喺馬爾代夫訂婚，今年10月先喺夏威夷正式舉行婚禮。女兒Tessa差唔多兩歲，JC趁住今日平安夜再度報喜，喺ig宣佈懷第二胎。

JC自拍咗一條短片，見佢着住一件白色冷衫，佢話：「Andy送咗新耳環俾我！同埋……我又有咗喇！」鏡頭影咗落個肚度，仲有一個紅噹噹嘅花球，恭喜晒！佢仲留言：「VERY grateful for my Christmas gifts! P.s. not from Santa.@andyonimal #babynumber2 @cartier」

不過，JC暫時未有公佈係仔定女，據知係啱啱懷孕3個月。數數手指，安志杰今年7月喺寧波拍戲整傷隻腳，腳筋斷裂行唔郁，經常要臥床休息，但就因禍得福多咗時間陪老婆同囡囡。(相關新聞﹕ http://bit.ly/2prvbdM )而JC早前出活動時已經講明話會日日造人，話好想製造一個聖誕BB，估唔到咁快就有好消息！

安志杰經理人公司發言人李小姐今日回覆《蘋果》話：「Jessica係有咗3個月，呢份係佢哋今年最好嘅聖誕禮物。其實生完第一胎之後，佢哋已經有計劃生第二胎，因為Jessica本身有三姊妹，Andy有個家姐一個細妹，所以一直想生多個小朋友，Andy話今次係上天送畀佢哋兩公婆嘅聖誕禮物，仔女都冇所畜，希望大家過一個開心嘅聖誕節，所以揀喺呢個日子公佈喜訊。」Andy因為接咗部大陸劇，特登向劇組申請聖誕放假返港陪家人過節，過兩日就會再返大陸開工，所以今個聖誕冇計劃出埠度假。

而JC透過經理人回答：「相當開心同興奮再做母親，因為一向都好鍾意小朋友，享受做媽媽的過程，現在已有3個幾月身孕。」經理人透露佢陀第二代冇特別不適：「聽佢講成日好攰，好想瞓，一般有BB嘅疲勞，同無胃口食嘢，所以反而瘦咗，同佢無BB體重差唔多，o依家就適應咗，希望佢聖誕食多啲嘢，補返多啲營養。」

更多娛聞，喺晒《娛果》
http://fb.com/appledailyent