人大常委會周末開會，親中報章盛傳將會由中國政府正式出頭做醜人。「作出相應決定」，政治局常委兼人大委員長吳邦國親自扑槌，講明二○○七冇特首普選。

特區名義上非罪人
由中方講明，亦即由中央人民政府直接負上歷史責任，乜嘢叫「中央只管國防外交，其他由港人自己決定」，鄧小平咁講，魯平又曾經咁講，白紙黑字嘅中英聯合聲明又係咁講。中國政府究竟遵唔遵守國際條約協議，中國領導人講過嘅說話，究竟值幾多錢，喺國際外交及經貿層面，全球包括台灣，自然會有一個公正判斷，呢一層毋須、而且到此田地亦唔到香港人擔心。
至於特區政府就將「斷送香港人自治」嘅歷史責任，輕輕一卸膊，名義上，自己點都唔使做千古罪人。中央人民政府叫阿董自己提出否決「雙普選」，阿董將個波交畀曾麟詩嘻哈三人組，三人組嘻哈一輪，扭兩腳話「○七○八選舉有必要修改」，煲呔向港人交貨，大腳將個波質番畀中央人民政府，而中央人民政府就call齊港區人大政協──亦即鄔維庸、曾憲梓等港人嘅「民意代表」去深圳「諮詢香港民意」，跟住就會兜腳射門，正式宣布「雙普選」死亡。

呢一招快刀斬亂蔴，七一大遊行後民意強烈要求普選，經已大晒肚，好似九龍城以前嗰檔「四姑接生」咁，中方操刀強行墮胎，全過程不足三分鐘，中央人民政府幾十年來習慣咗喺農村推行強迫人工流產嘅計劃生育，梗係經驗豐富，而特區政府嘻哈三人組，由煲呔負責將個產婦㩒實，林公公一手剝褲，而詩姑就負責遞一盆熱水，本來國家遞把子宮鉗畀阿董，叫阿董親手鉗挖，但阿董謙厚，拒不居功，又話自己老花，於是惟有焗住由中國政府戴住個口罩，揸架生親自上馬，而喬曉陽就喺身邊好聲安慰，叫個大肚婆放鬆。
民主派重話想上京闖關，即是想煽動個產婦再掙扎多兩嘢。
有乜用吖？國家經已好照顧港人感受，今次墮胎，針刺麻醉，等你冇咁痛，若然個大肚婆重郁身郁勢拒絕同四姑合作，四姑錯手將你香港成個子宮都撕裂埋，咁就唔知最後邊個負責咯。

化悲憤為補身力量
鬼叫港人未得家長同意，女生外向，私自大肚懷胎，國家重男輕女，又唔係唔知，現時「雙普選」呢對孖生女嬰，瓜就瓜硬嘅嘞，下次未經父母許可，千祈唔好立亂自己滾大個肚，今次不如乖乖合作，畀我國計劃生育嘅同嘻哈三人組順利「接生」，將對死胎鉗出嚟，好似珠三角某啲食肆咁用嚟煲埋湯，自己飲埋佢，化悲憤為補身力量，日後好快就會忘記創傷，重活血養顏㖭。


傳真︰2623-9278
電郵︰[email protected]