黎智英還柙｜30年前創辦壹週刊 肥佬黎一直堅持信念走下去 泛民李卓人李永達：佢做到了
蘋果日報 2020/12/16 00:26
黎智英荔枝角收押所
壹傳媒創辦人黎智英被指違反工業邨用地租賃條款，本月3日被控欺詐解上法庭，還柙候訊；在等候申請保釋之際，復遭警方國安處引用港版國安法，起訴他另一條勾結外國或境外勢力危害國家安全罪的罪名，被解往西九龍裁判法院提堂，結果遭國安法指定法官、總裁判官蘇惠德下令要還柙至明年4月16日再訊。今日是黎智英被關進荔枝角收押所第13日，早上泛民李卓人及李永達到荔枝角收押所探望黎智英，離開時他們都不約而同，大讚黎生的堅持難得，「佢有好堅強嘅信念，30年前做壹週刊之後，已經決定行呢條路…做到你30年前諗過嗰個信念，呢個就係你過到你考驗嘅時間，佢就做到喇。」
李卓人和李永達於上午8時半左右到，經排隊等候再見面，至上午10時左右離開。李永達指黎的適應力比他預計的強，「佢唔單止適應到，佢能夠好喜悅咁樣生活。主要係因為佢信仰方面，佢係覺得，佢自己係有一種捱苦嘅精神囉，覺得有一種歡愉嘅心情」。他指雙方見面短短15分鐘，「係咁係度笑，大家都笑」。
李卓人補充說：「用佢（黎智英）嘅字眼『出奇地平靜』，令我哋非常之敬佩佢，咁嘅環境下，佢瞓到覺，覺得平靜。」
李卓人引述黎說：「30年前已經開始壹週刊呢條路，一直堅持落去，唔會放棄…所以依家平靜咁、安心咁接受自己未來，一定會堅持，繼續去奮鬥，繼續走呢條路，走落去。」李卓人認為這是一個很清楚的訊息，讓全香港人知道，作為一個傳媒負責人，他釋懷地去接受現在的處境。
李永達強調這個堅持殊不簡單，「事實上係最大嘅考驗，以前辦報，殖民地年代、特區政府初期，都冇乜搞黎智英、冇乜搞蘋果日報、壹週刊。Jimmy如果過到呢關，相信全世界、香港人，世界上啲人，都信嗰種堅持，嗰種conviction（堅定的信念）。你講係好容易，呢個世界，個試、個考驗、個test呀，真係嚟到你面前，你夠膽做到你30年前諗過嗰個信念，呢個就係你過到你考驗嘅時間，佢就做到了。」
而今日天文台錄得市區最低溫13.4度，黎智英處之泰然。李卓人指他們問過黎生是否夠暖，「佢話被就好夠，覺得無問題，瞓到覺；除了第一晚瞓唔到之外，晚晚都瞓到，睇到佢平靜囉，淨係一晚有兩次閂閘開閘醒一醒啫。」
李卓人讚歎稱：「一個人喺咁嘅處境，可以瞓到覺，佢自己好接受亦都好堅持，唔會被呢個處境打敗，或者係覺得灰心喪志，對香港人嚟講，睇到大家嘅信念好緊要。」
李卓人和李永達離開時稱，黎智英以愉悅的心情面對當下，令他們更感敬佩。
另外，陳志全（慢必）亦出現，他表示是前來探望譚得志（快必），快必同樣因被指涉嫌違反港版國安法，遭還柙於荔枝角收押所候審。
陳志全（慢必）前來荔枝角收押所探望譚得志（快必）。
泛民李卓人李永達今早探望黎智英。
-----------------------------
你敢爆，我敢獎！ 立即WhatsApp 《蘋果》24小時爆相爆片熱線 或致電：63836568
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！