日前財爺鬍鬚曾寫咗篇關於「完美風暴」嘅網誌,「完美風暴」立即成為官場、政圈中人潮語,不過最近有官府中人同八方講,「完美風暴」真係有機會即將降臨,而刮起呢場「風暴」嘅人,唔係泛民同佔中三子,而係「魔童」王維基!
最近魔童再出手挑機,向商經局局長卡片蘇挑戰淋冰,卡片蘇接戰之餘,仲講話想同魔童冰釋前嫌。表面係客套說話,但喺某啲官府中人眼中,其實係先禮後兵,事關魔童司法覆核政府唔發牌畀港視單case,下禮拜就開審,魔童呢個時候現身挑機,正所謂「冰不厭詐」,官府中人自然猜測係咪為搞事做準備!
不過又唔怪得有官府中人「滴汗」,由於當日狼英死口唔認唔發牌畀港視同佢「一男子」有關,但係去到法庭,好多嘢都要公開,就唔到「一男子」唔認,若然俾傳媒、公眾質疑「一男子」當日係講大話,咁就真係大鑊。