梁球今年63歲，已婚，育有一子，家庭生活美滿，但係喺事業上就唔係咁順暢，身為失明人士，一心以為只要喺音樂上做得出色，就可以喺樂壇一展所長，畢竟音樂並非靠視覺去感受，奈何現實同理想總有出入，喺出完第一隻碟之後，梁球就因為佢係失明人士而被歧視，更被迫消失於觀眾眼前。

梁球自爆當年做咗一件錯事，令佢覺得萬劫不復：「件事係被迫同我經理人簽一份生死約，係違反梁球整個人嘅價值，我覺得自己出賣梁球嘅尊嚴、堅持嘅信念同平等，我簽呢份約，只係俾我最頭同最後一頁，成份約內容係拒絕俾我知道，以我一個咁重視公平同尊嚴嘅人，要我出賣自己，呢份約一定係有唔公平嘅嘢，但係最後我選擇咗簽，我真係對自己唔住，呢件事係好錯。」

離開咗樂壇嘅梁球，路途並非一帆風順，喺2007年發生咗件事，驚動到警方，佢話：「2007年喺失明人互聯會做緊義務工作，爭取路面交通、視障人士工作，當時有人話我代表佢哋，又幫其他團體發言，我覺得可以做就做，我冇簽約俾任何人。我離開之後，個會中一位何女士，o依家已經係個會嘅主席，佢不嬲同我有傾有講，但係嗰次打電話好有威嚇性，話有班friend見到我同一位女士行街，仲話影到我親密照，叫我出嚟傾吓，我好快答佢話唔會出嚟，叫佢公開；到2008年出現陳冠希事件，我就靈光一閃，我覺得應該去報案，當時警員拒絕受理，之後我同傳媒講，好快就旺角警署打俾我，叫佢搵何女士，件事就不了了之。其實我嘅用意唔單一係平反，係想將件事曝露係陽光之中。」

只要有才能，去到邊都會發光發熱，好似梁球咁，唔係所有人都離棄佢，後來仲俾梁球遇上一位知音人——同樣愛創作嘅夏蕙姨契仔郭家健（Ken），佢同梁球相遇相知，更跟對方學彈吉他，仲投資及提供場地俾梁球練歌。經過咁多風風雨雨先可以再次踏上樂壇，梁球最希望嘅係公開向聽眾道歉：「當年因為唱片公司決定，埋藏咗一個永遠的遺憾，我話隻碟個混音做得唔好，我話想再做，成張唱片有一種噪音，當時一齊出嘅其他歌手都有，我要求改，但係經理人同唱片公司同我講：『梁球，你係咪劉德華？如果你係劉德華，我即刻幫你，重新做過哂佢，細佬，你唔係劉德華喎！所以你唔好講廢話。』所以各位聽眾，如果你當年買咗梁球嘅唱片，我要同你哋躬鞠道歉，因為你哋忍受呢種噪音，仲支持我，我好感謝大家。」