每逢國際賽期，各大球會嘅主帥都坐立不安，寄望球員喺國家隊比賽冇傷冇病，平安歸來。經過幾日國家隊操練同比賽，曼聯同車路士等英超勁旅都有新傷兵。

比利時「爆炸頭」費蘭尼喺比利時對希臘場世盃外受傷，撞傷腳趾，踢唔到禮拜二對俄羅斯場友賽。曼聯呢排中場傷停問題嚴重，除咗新加入傷兵名單嘅費蘭尼，保羅普巴養緊傷，國際賽都踢唔到，加埋安達靴里拉嚟緊停賽，係得番卡域克叫做擔到大旗。另外，菲爾鍾斯同基斯史摩寧兩名英格蘭守將都因傷退隊，其中鍾斯傷勢較重。就咁數，曼聯喺國際賽期有三個球員受傷。

車路士方面，都有主將受傷，比利時門將泰拔高圖爾斯臀部受傷，都係踢唔到周二對俄羅斯場波，但據比利時記者講，高圖爾斯應該唔太嚴重。前鋒迪亞高哥斯達就喺日前西班牙國家隊嘅訓練入面整傷足踝，要照X光睇吓嚴唔嚴重。車仔本身有夏薩特小腿受傷，冇入選國家隊。

至於曼城嚟緊要大戰阿仙奴，中場奇雲迪布尼唔知出唔出得。又係關比利時國家隊事，上場對希臘場波，迪布尼因為鼠蹊受傷只可以坐喺看台睇波，之後返咗英國養傷。