韓國電視界最後兩張成績表《SBS演技大賞》及《KBS演技大賞》噚晚頒發,而喺頒獎禮舉行前,一眾出席嘉賓就先現身行紅地毯。
兩個頒獎紅地毯同樣星光熠熠及熱鬧,SBS方面有人氣劇《龍八夷》嘅金泰希同周元最受歡迎,至於KBS方面就自然以男神金秀賢最受歡迎。
不過一向打扮得靚一靚現身嘅女神金泰希,噚晚就似乎揀錯衫,佢着咗一件薄紗貼身長裙,睇起上嚟好高貴,但再睇真啲,佢上身胸前透出內裡嘅一件tubetop,看起來就好似平日睇古裝劇時,啲女主角為咗女扮男裝而成日用條白布包紮住個胸,唔知係唔係因為太緊關係,搞到本身都有身材嘅金泰希頓時變成好似平胸咁,加埋中間透視出腰肢,令本身纖瘦嘅金泰希又變成擁有水桶腰一樣,認真失策。
而喺SBS紅地毯上,過氣「國民妹妹」文根英就露少少背搶鏡,但卻不敵同場嘅朴寒星,朴寒星條裙中間開窿,好鬼性感。
至於KBS紅地毯上,有男神金秀賢駕到,佢一出場即大搶風頭,而佢都好親民見到在場粉絲都勁打招呼。至於其他現身KBS紅地毯都粒粒巨星,好似《生意之神─客主2015》嘅張赫,人妻Eugene就以一身高貴打扮現身,非常搶鏡。不過女星宋昰昀行紅地毯時,未知係唔係因為條裙太長,當佢上樓梯時就唔小心跌倒,佢都嚇咗一跳。
另外,噚晚陸星材亦要連趕兩場,佢先去《KBS演技大賞》,去到就風騷舉V,之後瞬間轉移,佢就即換過件外套火速行上SBS嘅紅地毯,當佢去到SBS時佢仲即刻跪喺地上做出跪拜甫士,十分鬼馬。