近年網上廣告大行其道，有報告顯示今年數碼廣告開支更將超越傳統廣告，傳統媒體固之然難做，但數碼廣告因受制於「facebook霸權」，廣告業界形容不少公司只是幫Facebook打工，就連年收入近億元的100毛亦只能被「牽住鼻子走」。當中五時花六時變的更新，令不少用戶以至專頁均怨聲載道。

據羅兵咸永道的報告顯示，去年香港數碼廣告收益逾50億美元（約390億港元），已超越傳統廣告，計未來五年的年增長率達6%，到2021年將增至66億美元（約514.8億港元）。

數碼廣告興起，不等於數碼廣告公司就能「搵大錢」，皆因要屈服在facebook的強權下。早前facebook更一度想推出「雙軌制」動態時報(newsfeed)，沒有付費宣傳的專頁帖子，會被「發配邊疆」。只不過其後反應太大才暫緩，但facebook上的自然接觸率（Organic Reach）早已被大大降低。

做「廢青」做到上市的100毛母公司毛記葵涌今年7月申請主板上市，據招股文件披露，截至今年3月底止，毛記全年收入高達9,522.8萬元，按年升73.6%；期內賺3,626.3萬元，按年升61.9%。三位「腦細」當然功不可沒，但成功仍然要得到時勢的配合。

本地廣告公司木棉集團助理總監陸偉傑指，近年數碼廣告得以興起的最大原因是「決定budget（預算）個班人開始覺得佢係自己都用呢樣野（online media），幾年前啲客會話『我唔知facebook咩嚟架喎』」。

他提到現時業內情況時提到，「大家都好明一個觀念，『你唔比錢係facebook啲野根本唔會見到』，有錢一定有人睇，幾hardsell（硬銷）嘅promotion（推廣）都會有人like，冇錢唔係冇人睇，只係冇咁effective（有效）姐。」

facebook 的變化相信一般人留意得到，從朋友分享生活的地方淪為網上廣告雜誌。資深社交媒體策略顧問呂贊柱指，facebook十年來做到最好的就是廣告模式「打亂內容次序，今朝會無啦啦睇返噚晚食晚飯啲野。」

他舉100毛近兩年雀巢廣告作例子，指出facebook的改動，「第一次時啲人洗晒版，我會見到朋友share，但第二次就算好多人share出嚟，就算我日日同呢個朋友傾計，我見唔到個post，大家見唔到係newsfeed就覺得冇人講」。

市場上不斷有新平台推出，希望挑戰facebook的地位，如Snap Chat、Medium待，但仍難敵facebook霸權，而騰訊（700）旗下的Wechat亦僅限於中國。陸偉傑坦言，「先不論facebook有幾差，但佢個廣告平台真係返到生意，marketer只好繼續用。」其他新平台，如Snap Chat仍未成熟，「其實係同扔落咸水海冇分別。」

最後，二人均認為，如今要在數碼廣告上的要突圍而出，好的內容已非重點，更重要的是要有錢去在facebook上落廣告，才可令內容得到其他人留意，未有新平台的出現前，亦只能夠繼續「科水」予facebook。

《蘋果》曾就業界的不滿及意見向Facebook 查詢，惟截稿前仍未獲回覆。

記者：梁偉聰

蘋果財經，關心你飯碗
http://fb.com/appledailyatm