國際賽日（9日）曲終人散，香港隊最終破天荒贏晒四場，最驚險的為潘頓騎「時時精綵」反先「雷神」莫雷拉操刀的日本代表「雍容白荷」捧走香港瓶（2400米），完全贏在潘頓留放妙到毫巔。

潘頓絕對好勝，否則就不會時常與其他騎師有口舌之爭，所以筆者認同戰友所言，有雷神在陣的潘頓，跑馬特別有心機，對捧場客來說反而屬好事。

此刻雷神回歸，可預期他會一如過往備受馬迷追捧，但同一時間，其實潘頓有他「燒住走」鬥心更強，受惠於協同效應，以莫、潘打雙箭頭有得諗！

你嫌他們賠率奀？但這頻密上名率，可以做到將本金不斷循環再用，達至錢搵錢效果。邊個話潘頓、雷神只係大戶可以賭？中熱門無肉食又一定無鬼用？問題在於你當賭馬是博彩賭運，還是有章法地長線投資。

原本剛周日（9日）尾場以為由「威進駒」及「四通八達」包Q大熱收場，殊不知被「安騏」轉摩廐初出一網打盡贏到收韁，戰友賽後即問，過往此駒在麥菲文，究竟練乜嘢馬？追捧麥菲文寶藏，可能是目前理想財路。

周三晚（12日）第四場四班1200米「飛雲騅」及第七場三班1000米「加州神箭」分別作離開麥廐後的「地標戰」，兼且在上手馬房算是較有表現一群，按理「含金量」更高，值得優先留意。

尤其「加州神箭」前仗曾於三班谷草1200米強組快放奪季，本身前速快，縮程跑1000米更合發揮，有力轉東廐後一出即勝。當然「飛雲騅」埋門試谷閘有聲有色，周三晚初次渡江，方嘉柏並非無的放矢，這匹麥菲文寶藏亦值得開採。