紡織股噚日一齊反彈,其中最勁係德永佳(321),大升7.34%,收5.85元,其餘冠華國際(539)、福田實業(420)同埋魏橋紡織(2698)都錄得不俗升幅。
經紀陳話,今日公布中期業績的廣興國際(1131),據講業績表現好好,可能有意外驚喜。
不過,當小初睇真啲,則發現廣興幾乎係噚日唯一唔升嘅紡織股,跌1.82%,收1.62元,成交金額388.5萬元。
經紀陳解釋,好多紡織股早前因為棉價上升影響,股價回落幅度唔細,就算噚日股價回升,仍然比起高位有一段距離,至於廣興現價因同52周高位1.75元相差唔遠,反彈力度當然稍弱,但如果今日公布業績靚仔,表現將脫胎換骨,其實隻股今時唔同往日,聽講有個基金坐咗唔少貨,而且經常增持,估計今次有人點都會做番一場好戲。
另外,經紀黃提及中期業績由盈轉虧的神州數碼(861),佢話隻股虧損主要來自上半年所作的撥備,下半年業績其實已經好轉,唔應該睇得太淡。
慕容小初