酷熱天氣警告35度高溫，仍然有幾萬人上街，證明香港人爭取民主嘅心真係灼熱如盛夏驕陽，普選訴求從來無降溫，而灣仔港鐵站修頓球場公廁「所長」林仔，可以話係呢股浩浩蕩蕩民主洪流見證人。

03年廁內人人鬧葉劉

修頓公廁位處遊行路線中段，好多人行到呢個中途站都會入公廁放低幾両，輕輕鬆鬆繼續餘下路程。林仔02年起駐守修頓公廁做潔淨員，八方尊稱佢「所長」，佢猛話過獎。多年來林仔見盡7.1遊行風雲，03年50萬人上街，佢話震撼場面歷歷在目。「當年好多人鬧葉劉，人人入到嚟都講粗口鬧佢。」市民怨氣谷到爆，就算遊行也宣洩不了，走入廁所更加滾滾而下，「成個公廁插針唔入，排晒長龍」。
雖然人流不絕，不過林仔說反而不太忙碌，「咁多人逼入嚟，唔可以洗地、抹嘢，整濕人哋會好麻煩，只係好多垃圾要執。」原來遊行人士沿途接過的單張、旗幟，多數在此丟低，「執滿幾大袋，多平日一半。」垃圾多，用廁紙更多，「近年7.1前會擺多啲廁紙備用，如果冇廁紙用，我哋俾人鬧o架。」
董下曾上，近年7.1遊行人數無復當年，兩朝「所長」林仔也察覺遊行期間用公廁的人少了，不過他認為另有原因，「初頭幾年用晒三條行車線，行入嚟公廁好方便，呢幾年靠近行人路嗰條線用嚟賣嘢（街站），冇咁方便行入嚟，所以人流少咗。」上街的人少了，怨氣也好像疏散了，「冇咁多人講粗口啦，就算講，都細聲咗」。
今年7.1遊行主題之一係爭取最低工資，公廁外遊行隊伍高喊時薪33蚊、35蚊口號，林仔說日做夜做，冇乜時間理呢啲問題，總之保住飯碗要緊，「八年換咗幾間外判公司，我好彩，做得算耐。」

政治複雜難過洗廁所

灣仔龍蛇混雜，林仔說在公廁內見盡人生百態，癮君子、醉漢、迷幻小子「乜嘢人都有」，一年一度大遊行見慣也平常，冇諗過上街加入，「政治呢啲嘢，好複雜、好麻煩，仲難搞過呢啲嘢，我唔識又冇興趣」。林仔一邊指着腳下的糞池，一邊搖頭。

mailto:[email protected]