南韓總統朴槿惠閨密崔順實干政風波，擾攘多時都未平息，當地民眾不時舉行集會要求朴槿惠下台，而多位韓星都被捲入今次事件，當中有國會議員安敏錫曾喺節目上爆料，指某位巨星同崔順實有交情，並因為認識崔順實姪女而獲得唔少好處，經常可以參與政府舉辦嘅活動，矛頭直指係「馬舞大叔」PSY，同時又指崔順實胞姊崔順德成立嘅「旋風足球隊」，拉攏唔少藝人參加。事後PSY所屬嘅YG事務所就否認其事，並指PSY不認識崔順實嘅姪女，而安敏錫噚日亦都回應話PSY唔係嗰位巨星，仲話如果嗰名藝人繼續講大話嘅話，佢就會公開名單。

雖然PSY同事件已冇關連，但佢似乎都因為今次事件上過唔少頭條，所以佢前日亦有喺Twitter到上載新聞連結同埋網民嘅搞笑截圖，當中網民就喺安敏錫澄清事件嘅新聞之下留言：「有人話PSY唔係踢足球嘅身材，超好笑」、「大家之前鬧PSY要佢去死，0依家公佈唔係佢又不關心了」，PSY就將回應截圖並留言「笑了.jpg」，正式回應事件，表達雖然被誤指係當事人，但自己都係一笑置之嘅心情。