岑潔儀今晚喺老公Dixon陪同下，於晚上十點三十五分乘坐黑色七人車，到達香港港安醫院準備生BB。

岑潔儀落車時，老公扶實太太，兩人一齊受訪，問岑潔儀幾時生得？佢話：「我0依家入去生。（開刀定順產？）開刀，因為擇咗時辰開刀。」而Dixon直言心情緊張。

問Dixon會否陪入產房？佢話都會，但就唔會拍片，問到係咪怕血？佢就話唔怕。咁呢胎係仔定女？岑潔儀話係男仔嚟。至於改咗名未？Dixon則謂已經改咗，不過暫時唔透露住。

岑潔儀表示：「叫佢小DC，因為老公叫DC，生完會餵人奶，營養好啲，0依家主張母乳，所以辛苦少少都會自己餵返。」問到事前有冇上育嬰班？佢話：「冇呀，一堂都冇上過，都係聽朋友意見囉。」Dixon則說：「我哋有請陪月。」岑潔儀表示：「係呀，不過到時老爺奶奶都會喺度。」

講到老婆生仔，問到Dixon獎勵太太？Dixon表示有份神秘禮物送畀太太，岑潔儀聞言開心謂：「吓﹗係咩？」Dixon笑稱：「生咗先啦﹗」
至於會否再追多女，湊成一個好字？Dixon則說：「暫時都冇（呢個計劃），睇下搞唔搞得掂先啦，等囝囝大少少先﹗」