入屋叫人，入廟拜神，Cloudy同大家哈佬一聲！作為小薯仔，仍在努力學習，所以刨到嘔泡都可能係人所共知的熱門馬，請各位多多指教。參考又好，明燈也罷，結果係點都唔好太躁，恥笑下我就好啦！

同時，更加感激《蘋果馬經》同編輯大人，真係沒齒難忘！俾咁大個機會我去發揮小宇宙！擦到個蘋果打哂臘。我足足緊張左一個禮拜……嘩！輕鬆手法任我貼？

發達啦！又可能個個都知，要我正經講好一場馬，同中99倍一樣咁講緣份。充滿水份之閒聊格仔，簡直係我之創作天堂！

第一稿正式開始，輕鬆簡單講我鍾意乜，點買點好，祝大家好運。今日都幾鍾意黃俊，頭場「霽月高風」上季尾四班賽頻頻掃獎金，快步速都跟唔散，但就係做阿二，激親好多人。

今季首戰跑返直路賽，排檔形勢唔差，加上主動跑法幫到盡。雖然話無做大閘兼多咗些少肉哋，快跳拍跳都幾夠Chok。

第六場「鋒芒畢露」應該可以自己帶頭，同場幾乎無快馬，佢呢個一檔貼欄可以再賺多次。少少哋就呢兩隻，希望六點三結算果陣，我地都執返多少，多就買個包包慶國慶，少都買樽潤膚露啦，秋高氣爽嘛！