韓國31歲女星李清娥於2011年同34歲男星李基宇合作韓劇《花美男拉麵店》認識，兩人於2013年正式發展成戀人。李清娥早前忙完劇集《好運羅曼史》嘅拍攝，今日接受訪問時亦大方提及男友。拍拖多年嘅兩人感情都好穩定，對於結婚呢個問題，李清娥亦直言啱時間就會結。

被問到兩人都咁忙，會唔會冇時間拍拖，李清娥都坦言因為太忙其實冇時間約會，但雙方都會為對方打氣加油。雖然李清娥同李基宇已經係公開情侶，不過對於公開提及男友，李清娥似乎依然有啲怕醜：「到0依家每當提到男友我都唔知應該點答，不過講到結婚，我諗啱時間就會結。」

李清娥又稱喺拍攝場地時見到人妻黃靜茵，都會覺得佢好幸福，會有種「結婚會有安全感啲」嘅感覺，不過佢又話目前都好有安全感，所以未諗到結婚嗰步，亦都好滿足0依家嘅狀況。