欣宜一首《女神》橫掃樂壇多個獎項，網民有讚有彈：讚佢終於爭氣；彈佢消費脂肪。鍵盤背後，唔知有幾多人真正親身有超重、企直低頭時望唔到腳趾公的經歷，就連英模Kate Moss都曾經講過「nothing tastes as good as skinny feels」，雖然歐美時尚界幾季前開始流行大碼模特兒，但現實中眼見周街廣告都話要瘦，着加大碼，其實都幾有壓力。

「其實我冇磅重，講真當肥到一個程度，你會唔敢踏上磅，睇到個數字『嘩！原來係呢個磅數』，會有壓力， 所以我不敢磅。」今年19歲的談家曦，現時喺大專修讀時尚文憑課程，佢買衫要買最大size，「淘寶就多數搵3XL或4XL」，喜歡經典英倫風格嘅佢，平常會以攝影透露自己對時尚想法，用時裝表達自己就手到拿來，但講到為自己打扮，唔只擔心冇碼揀，仲要承受他人目光，煩惱得多。「試過買衫時兩名售貨員喺我面前談論我，說：『嘩，佢買咩碼？』我呆一呆。」

根據衛生防護中心《香港健康數字一覽》（二零一六年編訂），香港18至64歲人士當中，有39%屬於超重或肥胖，其實並不罕見。這條加加加加大碼的時尚路，佢又會點行落去？

記者：黃樂雯
攝影：伍慶泉
場地提供：老二花廳