無綫生活台節目《全民開講》錄影，題目係最熱門嘅色情版風波，其中提到淫褻物品審裁處近日收到過千宗投訴，話《聖經》提及亂倫同性事，睇落認真「不雅」。浸大宗教及哲學高級講師陳士齊話投訴非常合理，皆因血氣方剛嘅18歲以下年輕人，睇完《聖經》都可能發綺夢，仲自爆自己都係咁，所以《聖經》係PG（家長指引）級讀物，兒童不適宜單獨觀看。
同場嘅中大校友王晶都係基督教學校出身，但佢話從來冇因為睇《聖經》而有性衝動；淫審處嘅審裁員張炳民就話宗教物品有豁免權，加上香港有成百萬基督徒，唔應該咁睇《聖經》喎。旁邊嘅陶傑就問，若果有百萬人企出嚟撐情色版，係咪就會收回評級，張炳民即刻反口話唔可以相提並論，即係雙重標準囉。