高官約吃飯，因人在灣仔，佢揀咗一間新派粵菜館，就在當舖地下。本來唔識呢間食店嘅，名都講唔出，但上咗的士話去近住福記間當舖，司機即刻識路。哎吔，由軒尼詩道轉入莊士頓道，乜咁鬼塞車㗎，的士行不得也哥哥，問司機：「乜呢度咁塞嘅？」司機話：「富豪飯堂就在轉彎之後，日日中午都係咁㗎嘞，啲富豪闊佬上車落車吖嘛，過咗就冇事。」果然，行到去福臨門門口，只見有五六位記者猛咁向內影相，門口行前幾步有一架大警車，唔怪得其他車輛有路難行，好彩高官醒目啫，如果約嚟福記飲茶，畀記者順便影埋相見報都似。
呢間新派粵菜酒家嘅裝修以懷舊氣氛為主調，點心擺上枱嘅「包裝」就似高級西餐廳，價錢與陸羽相差無幾，口味就見仁見智咯，新派人物大概會喜歡多啲。呢類「中學為體，西學為用」嘅中菜，最合留洋學生懷舊之情，唔通這就是香港古老文化？恐怕金融精英紛紛失業或失去花紅之後，呢類餐廳嘅經營就會困難啲咯。
讀完洋書喝過洋水，加入投資銀行，係最易搵快錢，搵大錢嘅途徑，但時移世易，英美興起一片嚴禁花紅之風，而做投資銀行嘅底薪，基本上並不太高，冇花紅派喎，啲叻仔叻女，如果唔係為咗花紅，做乜嘢要日日捱到三更半夜，當辦公室係大學宿舍？證券行、投資銀行與對冲基金基本上以花紅作為薪酬一部份，壓低底薪，部門冇錢賺就冇花紅分，係旨在鼓勵出眾表現嘅僱員，不幸金融海嘯帶來強烈反彈，領取花紅被視為「偷錢行徑」，新一代加入投行之前，唔該諗清楚。