雷霆總經理派斯迪（Sam Presti）周五透露，當家球星韋斯卜克（Russell Westbrook）因右膝注射高濃度血小板血漿，預計會缺陣頭幾日訓練營，但係情況並唔嚴重，所以唔會影響季前賽。

派斯迪特別強調，韋少今次右膝注射高濃度血小板血漿，同2013年拉傷韌帶嘅舊患並無關係。雖然韋少上季霞「大O」奧斯卡羅拔臣（Oscar Robertson）嘅紀錄，造出場均三雙31.6分、10.4助攻、10.7籃板，而且仲贏得常規賽MVP，不過派斯迪就話呢位28歲控衞仲有好多進步空間，佢仲希望韋少可以喺10月17日前完成續約㖭。

另外，派斯迪都對今夏加盟嘅保羅佐治（Paul George）讚不絕口：「呢個世界上，只係得少數球員有能力扭轉戰局。」