《東張西望》主播李旻芳與同期藝員訓練班出身的黃耀英拍拖近7年，今日李旻芳在《東張》節目內宣佈：「我要結婚嘞！」

李旻芳今日接受傳媒訪問時興奮地說：「噚日臨瞓前耀英求婚，今日《東張》係我開嘅第一個廠，所以我就通知咗監製同同事，始終我哋都係《東張》一份子，所以就話可以喺節目宣佈吓囉，我覺得開心事，都想即時同大家分享。」二人準備在今年11月拉埋天窗，她說：「暫時我媽媽擇咗11月5號係吉日啊。」

至於耀英則自爆求婚過程：「我整咗個尋寶遊戲，諗住下星期大家都放假就實行呢個計劃畀驚喜。點知噚晚臨瞓前傾偈，講開佢呢兩日病，咁就講吓人生死亡，我就突然覺得唔好嘥時間嘞，有啲衝動，就決定噚晚求婚！但亦因爲太突然，有啲亂，足足求咗3次，第一次蒙眼，但畀戒指時忘記幫佢除眼罩。又再嚟過，第二次音樂無端端斷咗，第三次就問佢『Would you marry me？』但佢又唔答我，要我提佢先識答。我諗佢都窩心嘅，因為求足3次都有眼淚，佢每次都交足戲，最後我哋仲一齊跳咗隻慢舞。」他笑稱當時大家都不靚仔靚女，穿上睡衣，但有兩隻狗圍住，氣氛好浪漫。

==============
剖析真相 守護公義
按此免費訂閱支持蘋果 無阻盡覽
https://hk.adai.ly/yic3hkAt7V