大批巿民噚日無懼酷熱天氣，由尖沙嘴梳士巴利花園出發，遊行往高鐵西九龍站「反送中」，有連登仔就喺遊行時有「驚人」發現。話說呢位叫「禾日水港」的網民，以「林兆波叫林鄭月娥落地獄」為題開post分享靚相，相中一名手持十字架、架上寫有「暴君林鄭下地獄，人神共憤」嘅遊行人士，外貌超似林鄭老公林兆波！

網民讚大義滅親

有網民睇到即笑指，莫非林兆波想振夫綱？亦有網民大讚林兆波今日站喺「文明的一方」，笑佢係咪想大義滅親？八方相信，今次只係純人有相似，皆因林鄭早前喺103萬人上街反對送中惡法後，仍然堅拒撤回送中惡法時，曾接受電視訪問，自爆佢老公唔認為佢有「賣港」，引述林兆波力撐自己，同佢講：「你點可能賣港呢？但你真係有問題，你做行政長官之後，就真係賣咗個身畀香港。」相信林兆波夠膽黑皮鞋襯白襪，都唔夠膽得罪老婆。